19 верасня, Мінск /Кар. БЕЛТА/. У Беларусі налічваецца амаль 30 заправак для газаматорнага транспарту. Аб гэтым расказаў намеснік міністра энергетыкі Дзяніс Мароз на сумесным пасяджэнні камісій Парламенцкага сходу Саюзнай дзяржавы ў Кітайска-беларускім індустрыяльным парку "Вялікі камень", перадае карэспандэнт БЕЛТА.
У прыватнасці, на пасяджэнні абмеркавалі перспектывы развіцця рынку газаматорнага паліва."Трэнд на павелічэнне выкарыстання газаматорнага паліва і замяшчэнне традыцыйных відаў паліва даволі актыўны. Эксперты прагназуюць, што да 2030 года доля газаматорнага паліва складзе каля 10 працэнтаў агульнага аб'ёму спажывання паліва ў свеце. Рэспубліка Беларусь не стаіць убаку ад гэтых трэндаў, і, шчыра кажучы, пытаннем прымянення газаматорнага паліва Рэспубліка Беларусь займаецца даволі даўно, з 1980-х гадоў, - расказаў Дзяніс Мароз. - Цяпер у Беларусі ёсць 28 заправачных станцый, якія рэалізоўваюць такое паліва для рэальнага сектара эканомікі, для насельніцтва".
У цэлым па развіцці гэтага напрамку ёсць дзве сферы - прымяненне кампрыміраванага газу і звадкаванага прыроднага газу. "Аднак пакуль прадпрыемствы па вытворчасці звадкаванага прыроднага газу ў нас не створаны. Тым не менш гэта не азначае, што для нас гэта тэма не цікавая. Мы ўважліва за гэтым сочым. Ёсць інвестыцыйныя праекты, яны знаходзяцца ў актыўнай стадыі прапрацоўкі", - сказаў намеснік міністра.
Важным аспектам эфектыўнасці функцыянавання сеткі з'яўляецца рацыянальнае размяшчэнне яе аб'ектаў. "Беларусь мае даволі вялікі транзітны патэнцыял, і выкарыстанне прыроднага газу для газаматорнага паліва, у першую чаргу, павінна быць арыентавана на лагістычныя маршруты. Наша размяшчэнне заправак дазваляе выкарыстоўваць гэты від паліва на ўчастках трасы Брэст - Масква, Санкт-Пецярбург - Гомель", - растлумачыў прадстаўнік Мінэнерга.
Важным аспектам перспектыў развіцця прыроднага газу на тэрыторыі Рэспублікі Беларусь з'яўляецца цэнавы фактар. Цяпер назіраецца актыўны пераход на выкарыстанне звадкаванага прыроднага газу з боку малога і сярэдняга бізнесу. "Гэта прыводзіць да таго, што Беларусь, напрыклад, займае па выніках 2023 года трэцяе месца па танным кошце транспартных паслуг менавіта ў сферы таксі. Тое, што нашы таксісты пераходзяць на прыродны газ, дае магчымасць даволі істотна знізіць іх затраты на эксплуатацыю аўтамабіляў, ну і, адпаведна, знізіць затраты на аказанне адпаведных паслуг", - лічыць Дзяніс Мароз.
Сумеснае пасяджэнне камісій Парламенцкага сходу па энергетыцы, транспарце, прамысловасці і гандлі Саюзнай дзяржавы праходзіць у індустрыяльным парку "Вялікі камень".
Перад наведваннем парка ўдзельнікі пасяджэння ўсклалі кветкі да мемарыяла Курган Славы.-0-
