14 сакавіка, Мінск /Кар. БЕЛТА/. У Беларусі стартуе сацыяльна-творчая праграма "У будучыню з надзеяй", якая праводзіцца ў адпаведнасці з дзяржаўнай праграмай па пераадоленні наступстваў катастрофы на Чарнобыльскай АЭС на 2021-2025 гады. Аб гэтым паведамілі БЕЛТА ў МНС.
Творчая акцыя дае магчымасць таленавітым дзецям, якія пражываюць на тэрыторыях, пацярпелых ад наступстваў катастрофы на Чарнобыльскай АЭС, выступіць на адной сцэне з вядомымі артыстамі, музыкантамі і выканаўцамі, паказаць свой талент і адчуць уласную значнасць. Разам з юнымі талентамі ў рамках праекта на сцэну выйдуць артысты Белдзяржфілармоніі і беларускай эстрады. Адначасова з канцэртамі будуць праходзіць экспазіцыі работ юных мастакоў.
Першы і другі туры пройдуць з 14 па 16 сакавіка ў Гродзенскай, Мінскай і Брэсцкай абласцях. Канцэртнымі пляцоўкамі будуць служыць дзіцячыя рэабілітацыйна-аздараўленчыя цэнтры "Лясная паляна" ў Смаргонскім раёне і "Світанак" у Пінскім раёне, аграгарадкі ў Столінскім і Лунінецкім раёнах, а таксама Івянец у Валожынскім раёне. Трэці тур запланаваны да правядзення з 21 па 25 сакавіка ў Гомельскай вобласці. Потым 6-7 красавіка эстафету прыме Магілёўская вобласць.
Фінальны пяты тур адбудзецца 23 красавіка ў дзіцячым рэабілітацыйна-аздараўленчым цэнтры "Ждановічы" ў Мінскім раёне.
Лепшыя юныя артысты і мастакі будуць узнагароджаны дыпломамі і сувенірамі.
Праграма пачалася ў чэрвені 1986 года. Сёння арганізатарамі праекта выступаюць Дэпартамент па ядзернай і радыяцыйнай бяспецы МНС (Дзяржатамнагляд), Міністэрства культуры, раённыя выканаўчыя камітэты Брэсцкай, Магілёўскай, Гомельскай, Гродзенскай і Мінскай абласцей. Падтрымку аказвае Беларускі фонд міру.-0-
